மகளிர் வெற்றிப்பயணம் திட்டம் எதிரொலியாக தூத்துக்குடி பேருந்து நிலையத்தில் அரசு பேருந்து ஊழியர்கள் மற்றும் தனியார் பேருந்து ஊழியர்கள் இடையே மோதல் ஏற்பட்டது.
தமிழ்நாட்டில் மகளிருக்கான கட்டணமில்லா பேருந்து திட்டமான 'வெற்றிப் பயணம்' விரிவுபடுத்தப்படுவதால் தனியார் பேருந்துத் துறைக்கு பெரும் வருவாய் இழப்பும், தொழில் பாதிப்பும் ஏற்பட்டுள்ளதாக உரிமையாளர்கள் கவலை தெரிவிக்கின்றனர்.
அரசுப் பேருந்துகளில் பெண்கள் இலவசமாகப் பயணம் செய்வதால், தனியார் பேருந்துகளில் பெண்களின் பயணம் கணிசமாகக் குறைந்துள்ளது. இந்த நிலையில் தூத்துக்குடி பேருந்து நிலையத்தில் இருந்து இன்று காலை திருநெல்வேலி செல்லும் அரசு பேருந்தில் பெண்கள் கூட்டம் அதிகமாக காணப்பட்டது.
ஆனால் தனியார் பேருந்துகளில் பயணிகள் கூட்டம் மிகவும் குறைவாக காணப்பட்டது. பயணிகள் அரசு பேருந்துகளில் செல்ல ஆர்வம் காட்டுவதால் பேருந்து நிலையத்தில், அரசுப் பேருந்துகளை மறித்து நிறுத்தப்பட்டதாக கூறப்படுகிறது. இதனால் அரசு பேருந்து மற்றும் தனியார் பேருந்து ஊழியர்கள் இடையே வாக்குவாதம் ஏற்பட்டு பேருந்து நிலையத்தில் பரபரப்பு நிலவியது.
